He kāinga mō tātou katoa
Ko te wero ki Te Papa Tongarewa kia hangaia he wharenui, he marae, mo te rautau e tu mai nei, te rautau rua tekau ma tahi; he marae hei whakapumau i te tikanga nei na - mo nga iwi katoa o Aotearoa, ka whai mana nga tangata katoa ki konei. He mea whakamiharo, e mea ana ki nga manuhiri katoa, ko tatou tatou.
Kia tomo mai te manuhiri i te waharoa, e whai ana ratou i nga tapuwae o te hunga haerewa i tau mai ki konei, penei i a Kupe, i a Kapene Kuki, me te mano tangata i whai mai. Ka anga atu ratou ki te tatau nui mataaho - kia puare, ka puare whakarunga, hei tohu i te wehenga o Ranginui raua ko Papatuanuku - ko Ranginui te ingoa. Kia puare a Ranginui, ka kitea atu te maraekiroto me te wharenui, ka kitea atu nga mahi toi hou i nga pakitara, i te wharenui; anana, ma wai e whakamarama, ma wai e whakaMāori, te ataahua te whakamiharo te tohungatanga o nga mahi i oti.
Ka kitea ta te Māori korero mo te orokotimatanga o te ao. E noho nei tatou i te ao marama, i wehe ai a Rangi raua ko Papa - ko Papa kei raro, ko Rangi kei runga, kei te wharenui ko ta raua tama ko Tane, nana nei raua i wehe.
Ka noho na te whanau a Rangi raua ko Papa, tenei me ana mahi, tena me ana mahi; i a Tawhirimatea ko nga hau; i a Tangaroa ko te moana; i a Tane ko te ngahere; e tu nei a Te Papa Tongarewa, me tana wharenui, me tana marae, i te huihuinga o enei mana - nga tai o Te Whanganui a Tara e haruru mai ra, me nga hau o Te Upoko o te Ika e pupuhi tonu nei.
Ko te whare nui, ko Te Papa Tongarewa; ko te wharenui o Te Papa Tongarewa ko Te Hono ki Hawaiki, i te mea i ahu mai te Māori i Hawaiki nui i Hawaiki roa i Hawaiki pamamao. Ko te tohunga whakairo ko Cliff Whiting, ko ia nei te Kaihautu o Te Papa Tongarewa. Ko ana kaimahi no nga hau e wha, no nga kuratini, he rangatahi. Ko nga korero i whakairia no te ao tawhito, ko nga rakau me nga taonga whakairo waihanga i nga mahi toi no te ao hou.
Ko te kaupapa o te marae, he whakatau i te manuhiri kia whai wahi ki konei, kia matau te katoa o nga huihuinga tangata o Aotearoa no ratou tenei marae. Ka kite ratou i nga korero mo ratou kei runga i te whare e iri ana, ka whakapapa ratou ki aua korero. Ahakoa ko wai ratou, ahakoa he aha a ratou mahi, ka tau ratou ki tenei marae ki tenei whare, i runga ano i nga whakapapa o te katoa e noho nei e mahi nei i Aotearoa mai i te timatanga, ahakoa Māori, ahakoa ehara i te Māori. Ko nga momo hui katoa o enei ra haere ake nei, ka taea te whakahaere ki konei - heoi ano mana e whakauaua ma te rahi o te tangata tera e hui mai.
> See the Marae presented by What Now (video starting at 1.34 seconds)