Te Tiriti o Waitangi – te pukapuka whakaū i a Niu Tīreni
Ahakoa te ngaronga atu o ngā tau i hainatia ai, kei te ora tonu te Tiriti o Waitangi, kei te tohe tonutia, kei te wareware tonutia, kei te mahara tonutia. He take rānei e noho tahi ai tātou katoa, he take rānei hei wehewehe i a tātou? He kore kiko rānei, he papa rānei hei hanga kaupapa whakakotahi i a tātou? Ko te kaupapa o tēnei whakaaturanga, he kawe mai i ngā tikanga o Te Tiriti ki tēnei wā e noho nei tātou, he āta titiro ki ōna hua me ōna painga, mō ngā iwi katoa e noho nei i Aotearoa.
Māu anō e titiro ki te āhuatanga o tēnei whakaaturanga. Haere mai, e noho, titiro, whakaaro, whakarongo, nohopuku. E kai ō kanohi, whakarongo ki te hunga kua mene ki te pō. I te wāhi i raro i te papawaenga āta tirohia ngā kōrero kei ngā tuhituhi, āta whakarongo ki ngā kōrero a ētahi e pā ana ki te papānga o te Tiriti ki runga i a rātou.
I te wā nei e haere tonu ana ngā kōrero me ngā whakaaro mō te Tiriti, he nui ngā rerekētanga hei whakarongo mā tātou. Kei runga ake nei tētahi wāhi e iri ana ngā kōrero mō Pōringi e whakamārama ana te ara o te kerēme i raro i Te Tiriti. He nui ngā kōrero kei reira anō e iri ana hei titiro māu, hei whakaaro māu e pā ana ki te whakatakoto kerēme ki te Karauna me te whakatau i aua kerēme.
Ka mau tonu Te Tiriti ki ā tātou tirohanga whakamua mō Aotearoa. Ko te wero a Te Papa Tongarewa, nā Te Tiriti i whai mana a Niu Tīreni.