Nau mai, haere mai ki Te Papa Tongarewa!
Haere mai ki te whare tongarewa ā-motu nei, ki Te Papa Tongarewa!
Mai i tōna whakatuwheratanga i te tau 1998 kua rongonui whānuitia Te Papa puta noa i te ao mō tōna ara hou, māia hoki ki te whakaatu i ngā taonga me ngā kōrero a te whenua nei. Tae noa ki nāianei, neke atu i te tekau miriona ngā tāngata kua toro mai ki tēnei whare tongarewa ahurei.
He waharoa a Te Papa ki te ara e tūtaki ai te tangata i te iho o te whenua me ngā iwi o Niu Tīreni. E whakaaturia ana he taonga whakamīharo, he mahi toi hoki mā ētahi kōrero ātahu, ētahi whakamāori whakaohooho hinengaro me ētahi mahi pāhekoheko tau.
Ka torotoro koe i te whānuitanga o te hītori o Niu Tīreni puta noa i ngā papa e rima o tā mātou whare nunui - mai i te auaha i te whenua ki ngā wairua o ōna momo iwi rerekē, mai i ōna momo kīrehe ahurei ki tōna ahurea ataata kōhure.
Ka tūtaki koe ki te Māori, te iwi taketake o Niu Tīreni, mā ngā whakaaturanga pono o ā rātou ake tikanga me tō rātou ahurea ora, me te marae ahurei o Te Papa, he wāhi e whakatenatenatia ai te hunga peka mai katoa ki te toro atu.
He pou here mō ngā whakaaturanga ahurei ko ngā kohinga a Te Papa, e whakahaerehia ana, e whakawāteatia ana e ngā tohunga tiaki taonga. Kei te whakawhanakehia, kei te whakareia ngā kohinga e ngā hōtaka rangahau haere tonu.
He wāhi a Te Papa e maioha ana i ngā manuhuri katoa, ahakoa te pakeke, ahakoa ngā whakaihiihi. Kei te taha o ngā whakaaturanga whakaongaonga ko ētahi whakaaritanga ngahau, tau hoki, tae atu ki ngā whakaari pakiwaituhi, haerenga whakatau nekeneke ki mua, ki tua rānei, me ngā mahi pāhekoheko pēnei i te tirikohu waehere, he mea mariko. Me ōna wāhi ako wheako, wāhi pāhekoheko he wāhi whakaharahara a Te Papa mā ngā tamariki.
Hei kīnaki ki tō pekanga mai ko te hōtaka mahi, hōtaka whakangahau e ngahau ana, e hihiri ana.