I te mea ko Te Papa Tongarewa te Whare Tiaki Taonga o Niu Tīreni, ko ia ki te tiaki i ngā tini kohinga me ngā mano taonga a ngā iwi maha o Niu Tīreni me ō rātou uri whakatupu.
E whakaaturia ana aua taonga i ngā whakaaturanga a Te Papa Tongarewa, e tukuna ana ki ētahi atu whare taonga o Niu Tīreni, o tāwāhi, mō ā rātou whakaaturanga. He rōpū kaitiaki kei Te Papa Tongarewa kei a rātou ngā tohungatanga mō te mahi tiaki taonga hei tiaki i ā tātou kohinga taonga.
He maha ngā momo papanga i hangaia mai ai tēnei mea te taonga. Kei ā mātou kaitiaki ngā mātauranga o aua papanga katoa, kia pai ai tā rātou tiaki. Kei ngā kohinga maha me ngā papanga maha ngā uauatanga hei tirohanga, hei whāwhātanga mā ngā kaitiaki. Mā te whānui o ā rātou tohungatanga ka taea e rātou ā rātou mahi kaitiaki.
Inā koa, e tirohia ana te mākū ranei, te mahana rānei, o ngā rūma kei reira ngā taonga e tiakina ana, kei tipu te pūkahukahu, te heka rānei i runga i ngā taonga kei puruhekaheka, ka tipu te pirau. I waihangatia ngā tikanga tiaki kia kaua e pā tonu te ringa ki ngā taonga.
He mahi nui anō te tiaki i ngā taonga kei muia e te pēpeke, e te kīrearea, e te ngārara. He tohunga ā mātou kaitiaki ki te tiaki taonga, ki te hanga whakaaturanga e kore ngā taonga e raruraru, ki te tiaki i te mahi tono taonga mai i tētahi wāhi ki tētahi atu wāhi.
E mātau ana ā mātou kaitiaki ki te tiaki i ngā pirautanga, ki te whakahou i ngā wāhi pirau. E mārama ana rātou ki nga tikanga ā-iwi o ngā taonga. E mārama ai tātou ki ā tātou taonga tuku iho, me mārama tātou ki ngā tikanga a ngā mātua mō aua taonga, ngā tikanga a te hunga nā ratou i waihanga, nā rātou i awhi, i whakanui aua taonga.
Mehemea he mate kei ngā taonga hei whakaora mā ngā katiaki, ka āta whakamāramatia e rātou ā-tuhi, ka āta tirohia te āhua o te mate, ka āta tirohia ngā pukapuka a Te Papa Tongarewa mehemea he kōrero anō ā rātou mō ētahi mate kua oti te rongoā i mua, ka āta whakaahuatia te taonga i mua i te whakaoranga i te mate, ka whakaahuatia anō kia oti te rongoā. Mā te āta tātari i ēnei mahi tiaki whakaora mate ka kitea anō ētahi āhuatanga o te taonga tērā i hunā e te kaihanga, i te ngaro rānei i ngā kaitiaki.
He mea nui ki ngā kaimahi a Te Papa Tongarewa te mahi tiaki i ngā taonga i te wā e tiakina ana i roto i te whare taonga, i te wā e ahu atu ana ki whare taonga kē, i te wā rānei e whakaaturia ana i ngā whakaaturanga. He mea nui anō hoki te āta whakatakoto i te wā e whakaaturia ana.